Serena aftur í efsta sæti heimslistans

Serena Williams hefur aftur komið sér í efsta sæti heimslistans í tennis eftir að hún komst áfram í þriðju umferð opna kínverska meistaramótsins í Peking.

Sú sem var á efsta sæti listans, Dinara Safina frá Rússlandi, féll hins vegar úr leik í annarri umferð á mótinu. Það dugði því Williams að ná lengra en Safina á þessu móti til að hafa efsta sætið af Safinu.

„Ég er auðvitað mjög ánægð með að ná þessum árangri því ég hef lagt mikið á mig á þessu ári. Mér finnst að ég eigi það skilið," sagði Williams.

Stigakerfið hefur verið umdeilt þar sem að Safina hélt efsta sæti heimslistans þó svo hún hafi aldrei unnið risamót í tennis. Engu breytti þó svo að Williams hafi borið sigur úr býtum á bæði opna ástralska meistaramótinu sem og Wimbledon-mótinu í ár.