Forbes tímaritið hefur birt árlegan lista sinn yfir 400 ríkustu Bandaríkjamennina. Fram kemur að þessi hópur hefur tapað samtals 300 milljörðum dollara eða ríflega 37.000 milljörðum kr. á liðnu ári. Þetta er í fimmta sinn á síðustu 27 árum þar sem ríkidæmi þessa hóps skreppur saman á milli ára.
Heildarauður hópsins stendur nú í 1.570 milljörðum dollara en toppsætið á listanum vermir sem fyrr Bill Gates stofnandi Microsoft og eru auðæfi hans metin á 50 milljarða dollara eða 6.200 milljarða kr.
Í öðru sæti er Warren Buffett en hann hefur tapað mestum fjárhæðum á árinu af öllum sem eru á listanum. Auður hans er metinn á 40 milljarða dollara sem er 10 milljörðum dollara minna en hann átti fyrir ári síðan. Tapið skýrist að mestu af fallandi gengi hlutabréfa í Berkshire Hathaway fjárfestingarfélagi Buffett.
Sem fyrr eru eigendur verslunarkeðjunnar Wal-Mart allir á topp tíu listanum yfir ríkasta fólk Bandaríkjana. Í sætum númer 4 til 7 eru þau Christy, Jim C., Alice og S. Robson Walton en auðæfi þeirra hvert um sig eru á bilinu 19 til 21,5 milljarðar dollara.
Lawrence Ellison stofnandi Oracle er þriðji ríkasti Bandaríkjamaðurin og Michael Bloomberg er í áttunda sætinu. Bræðurnir Charles og David Koch eru svo í 9. og 10. sæti listans.
