Ronaldo hugsanlega klár í slaginn um næstu helgi

Cristiano Ronaldo verður sem kunnugt er ekki með Portúgal í leiknum mikilvæga gegn Bosníu á miðvikudag í seinni leik þjóðanna umspili um laust sæti á HM næsta sumar en leikmaðurinn gælir aftur á móti við það að spila með Real Madrid um helgina.

Hinn 24 ára gamli Ronaldo hefur ekkert getað leikið með Real Madrid síðan hann meiddist í 3-0 sigurleik gegn Marseille í Meistaradeildinni í lok september en spænska félagið hefur gengið í gegnum erfitt skeið síðan þá.

„Það sem skiptir mestu máli er að ég verði orðinn hundrað prósent leikfær þegar ég sný aftur. Ég er annars vongóður um að ég verði byrjaður að æfa á fullu í lok vikunnar. Við skulum svo sjá til hvort að ég geti ekki spilað um næstu helgi," er haft eftir Ronaldo í viðtali við spænska dagblaðið AS en Real Madrid mætir Racing Santander í spænsku deildinni á laugardag.