Hamilton: Frábært að fá Schumacher aftur

Lewis Hamilton, ökumaður McLaren, segist hæstánægður með að Michael Schumacher muni keppa í Formúlu 1-mótaröðinni á nýjan leik.

Tilkynnt var í morgun að Mercedes GP, sem tók yfir meistaralið Brawn GP í síðasta mánuði, hefði samið við Schumacher um að keppa fyrir hönd liðsins næsta árið. Liðsfélagi hans verður annar Þjóðverji, Nico Rosberg.

„Það er frábært að fá Michael aftur í Formúluna," sagði Hamilton við enska fjölmiðla. „Hann er goðsögn, frábær náungi og ég er ánægður fyrir hans hönd að hann fær nú að sinna aftur besta starfi í heimi - að keppa í Formúlu 1."

„Ég fylgdist vel með Michael þegar ég var að keppa í yngri flokkunum og ég vonaðist alltaf til þess að hann yrði enn að keppa þegar ég myndi byrja í Formúlunni. Ég hlakka mikið til að sjá hann á brautinni."