Málaferli gegn breska ríkinu vegna taps á íslensku bönkunum

Góðgerðarfélög í Bretlandi ætla í mál gegn breska ríkinu vegna ákvörðunar breskra stjórnvalda um að félögin muni ekki fá bætt fjárhagslegt tap sitt af hruni íslensku bankanna s.l. haust.

Fjallað er um málið á vefsíðunni ThirdSector, fréttabréfs samtaka góðgerðarfélaga í Bretlandi. Þar segir að forráðamenn þessara félaga séu æfir af reiði vegna ákvörðunar fjármálaráðuneytisins breska frá því á föstudag.

Um er að ræða 30 góðgerðarfélög sem töpuðu samtals 50 milljónum punda, eða rúmlega 10 milljörðum kr. á hruni Kaupþings og dótturbanka þess Singer & Friedlander í Bretlandi.

Peter Hepburn formaður Save our Savings, sérstakra samtaka góðgerðarfélaganna sem áttu reikninga í fyrrgreindum bönkum segir að meðlimir samtakanna væru æfir af reiði og ætluðu ekki að gefast upp í baráttu sinni við að fá peninga sína endurgreidda.

„Við höfum verið kurteis gagnvart stjórnvöldum hingað til og það hefur ekki virkað," segir Hepburn. „Við eigum ekki annarra kosta völ núna en fara með málið fyrir dómstóla."

Og formaður barnaspítalans Naomi House, Khaid Aziz, segir að sér sé algerlega misboðið yfir afstöðu stjórnvalda. „Eina ferðina enn eru góðgerðarfélög, sem treysta á framlög frá almenningi, skilin eftir ein á skeri," segir Aziz.