Íslensk hjón í Noregi framleiða harðfiskflögur

Íslensku hjónin Kristín Hafsteinsdóttir og Kristjón Bergmundsson á Sommaröy í Noregi hafa þróað og framleitt stökkar og örþunnar harðfiskflögur sem hvorki molna né lykta.

Fjallað er um málið á vefsíðunni Interseafood.com. Þar segir að hollara verði það ekki. Orkumikil próteinsprengja sem varðveitir öll næringarefni fisksins og bragðast eins og harðfiskur, segir í Trend og Tradisjon, tímariti um mat sem er gefið út í Norður-Noregi.

Þau Kristín og Kristjón vilja ekki láta uppskátt um hvernig flögurnar eru búnar til.

"Við fengum hugmyndina óvænt og höfum varið tíma í að þróa hana," segja hjónin í viðtali við Trend og Tradisjon. "Við erum mjög vandfýsin á hráefni, aðeins það besta er notað í framleiðslu á Hafgulli. Allt annað er framleiðsluleyndarmál."

10 þúsund pokum af þessu sælgæti verður dreift í valdar verslanir. Nú bíða þau spennt eftir viðtökunum. Fyrstu kynningar lofa góðu, fólk er mjög hrifið, segir Kristjón Bergmundsson.