Deco á leið frá Barcelona

Portúgalski miðjumaðurinn Deco hefur lýst því yfir að hann ætli að fara frá Barcelona í sumar. Stuðningsmenn Barcelona bauluðu á hann í tapinu gegn Mallorca um síðustu helgi.

Deco er samningsbundinn Barcelona út leiktíðina 2010, en talið er að forráðamenn félagsins hafi gefið honum grænt ljós á að ræða við önnur félög.

"Ég vil ekki halda áfram að spila með liði í þessari stöðu. Þá er betra að fara eitthvað annað - þar sem fólk kann að meta það sem maður er að gera. Klúbburinn er að minnsta kosti hreinskilinn við mig. Ég mun fara til Englands eða Ítalíu, því eina liðið sem ég gæti farið til á Spáni er Real Madrid og þangað fer maður ekki þegar maður hefur spilað með Barcelona," sagði Portúgalinn.