Enn meiri Vonbrigði

Hljómsveitin Vonbrigði, sem neitaði um daginn að selja frægasta lag sitt, „Ó Reykjavík" í símaauglýsingu, hamast nú við að klára nýja plötu með Halli Ingólfssyni. „Menn eru alveg að tapa sér," segir Jóhann Vilhjálmsson, Jói í Vonbrigðum. „Þetta er rokk og ról út í gegn og allt á fullu blasti. Engin róleg lög."

Hljómsveitin hætti störfum á 9. áratugnum en sneri aftur árið 2004 með plötuna Eðli annarra. Þar var endurunnið gamalt efni. „Það verður bara nýtt efni á nýju plötunni," segir Jói. „Við byrjuðum með sex gömul lög sem við ætluðum að taka en svo duttu þau út eitt af öðru. Það er hugur í mönnum og okkur langar til að fara að spila."

Jói segir að nýja Vonbrigðaplatan komi ekkert endilega út fyrir jól, „Nei nei, það er ekkert stress. Við klárum þetta bara og sjáum svo til."