Allt í lagi þrátt fyrir gjaldþrot Lehman

„Bandaríkjamenn geta verið rólegir,“ sagði Henry Paulson, fjármálaráðherra Bandaríkjanna, á blaðamannafundi í Hvíta húsinu í Washington í Bandaríkjunum í dag. Hann lagði ríka áherslu á að fjármálakerfi landsins væri stöðugt þrátt fyrir gjaldþrot Lehman Brothers sem tilkynnt var í morgun. Hins vegar verði að auka eftirlit og lagaumgjörð um húsnæðissjóði og fjármálakerfið. Spurður um það hvers vegna bandaríski seðlabankinn og JP Morgan hafi ekki gripið til svipaðra aðgerða og þegar Bear Stearns rambaði á barmi gjaldþrots svaraði Paulson því til að aðstæður væru aðrar nú en í vor. Ekki kæmi til greina að láta skattgreiðendur gjalda fyrir gjaldþrot bankanna. Væri þróun mála jákvæð til lengri tíma litið. Paulson sagði rót vandans liggja í bandarísku fasteignabólunni sem hafi sprungið með látum. Vinni hann ásamt seðlabönkum og hinum ýmsu eftirlitsstofnunum vestanhafs að því að vinda ofan af vandanum. Ólíklegt sé að takist að vinda ofan af málinu en reikni hann með að það muni taka nokkra mánuði fremur en að telja það í árum. Boðað var til fundarins eftir gjaldþrot fjárfestingabankans sem hefur valdið skelli á alþjóðlegum hlutabréfamörkuðum í dag.