Safnplata frá Melua

Söngkonan Katie Melua, sem hélt tónleika í Laugardalshöll fyrir tveimur árum, gefur út tvöfaldan safndisk á mánudag. Á fyrri disknum verða sautján lög, þar á meðal The Closest Thing To Crazy, Nine Million Bicycles og What A Wonderfuld World sem hún söng með Evu Cassidy.

Einnig verða þar þrjú áður óútgefin lög. Á síðari disknum er sýnt frá tónleikum sem Melua hélt í Rotterdam fyrr á árinu, auk þess sem skyggnst er bak við tjöldin við undirbúning tónleikaferðar hennar. Fram undan hjá Melua er tónleikaferð um Bretland sem verður hennar stærsta þar í landi til þessa.