HSBC afskrifar 1.100 milljarða króna

Breski bankinn HSBC, einn af stærstu bönkum Evrópu, hagnaðist um 12,2 milljarða punda, jafnvirði 1.600 milljarða íslenskra króna, á síðasta ári. Þetta er tíu prósenta aukning frá í hitteðfyrra.

Þrátt fyrir þetta þurfti bankinn að afskrifa 8,7 milljarða punda, jafnvirði 1.138 milljarða króna vegna taps á verðbréfum sem tengjast bandarískum fasteignalánum. Þetta er jafnframt mestu afskriftir breskra banka.

Stephen Green, stjórnarformaður HSBC, segir fjármálafyrirtæki víða um heim hafa lent í miklum kröggum vegna lausafjárþurrðarinnar sem hafi farið yfir alþjóðlega markaði upp á síðkastið. „Það er óvíst með útlitið á þessu ári," segir hann í samtali við breska ríkisútvarpið í dag. Green segir ekki útilokað að ástandið eigi enn eftir að versna áður en viðsnúningur verður.