Fyrsta tap í sögu UBS

Svissneski risabankinn UBS tapaði 4,4 milljörðum franka, jafnvirði tæpra 300 milljarða íslenskra króna, á síðasta ári samanborið við 12,3 milljarða franka hagnað í hitteðfyrra. Tapið, sem er það fyrsta í sögu bankans, er tilkomið vegna afskrifta á lánavöndlum upp á 26,6 milljarða bandaríkjadala, jafnvirði 1.800 milljarða íslenskra króna.

Lánin eru hins vegar ekki tengd bandarískum fasteignalánum, sem valdið hafa undirmálalánakrísunni svokölluðu á fjármálamörkuðum.

Afskriftirnar eru hins vegar talsvert meiri en markaðsaðilar höfðu reiknað með, að sögn breska ríkisútvarpsins. Útvarpið bendir ennfremur á að umfangsmikil skipulagsbreyting eigi sér nú stað innan veggja UBS, sérstaklega í eignastýringu bankans til að minnka markaðsáhættu. Bankinn hefur, líkt og fleiri bankar, leitað eftir fjármagni í Síngapúr og Miðausturlöndum til að bæta eiginfjárstöðuna.

Taka ber fram að UBS sem slíkur býr ekki að langri sögu en hann varð til með sameiningu Union Bank of Switzerland og svissneska banka atvinnulífsins fyrir ellefu árum.