Fall á erlendum hlutabréfamörkuðum

Gengisfall hefur verið á evrópskum hlutabréfamörkuðum frá upphafi viðskiptadagsins í dag. Ótti fjárfesta um yfirvofandi samdráttarskeið og efnahagskreppu fékk byr undir báða vængi í morgun þegar Nikkei-vísitalan féll um tæp fjögur prósent, að sögn breska ríkisútvarpsins.

Litlu virðist hafa skipt þótt George W. Bush, forseti Bandaríkjanna, hafi komið fram með hugmyndir um skattalegar ívilnanir til handa þarlendum fyrirtækjum til að hindra að svartsýnisspár næðu fram að ganga. Þá hefur bandaríski seðlabankinn sömuleiðis sagst ætla að grípa til aðgerða. Telja flestir yfirgnæfandi líkur á að bankinn lækki stýrivexti í enda mánaðar um fimmtíu punkta hið minnsta.

Helsta ástæðan fyrir lækkuninni í Asíu í morgun er sú að lönd álfunnar eiga mikið undir útflutningi til Bandaríkjanna. Verði samdráttur í Bandaríkjunum mun draga úr innflutningi og þar af leiðandandi úr hagvexti viðskiptalandanna.

FTSE-vísitalan í Bretlandi hefur það sem af er dags fallið um 2,3 prósent, hin þýska Dax um 2,4 prósent og Cac-40 vísitalan í Frakklandi um 2,7 prósent.

Norrænir hlutabréfamarkaðir hafa ekki farið varhluta af þróuninni en aðalvísitölur hafa fallið um rúm 2,0 til 2,9 prósent. Viðskipti hefjast í Kauphöll Íslands eftir rúman klukkutíma.