Eiður lék allan tímann í jafnteflisleik

Eiður Smári Guðjohnsen lék allan leikinn fyrir Barcelona sem gerði í kvöld 2-2 jafntefli gegn Alcoyano á heimavelli. Þetta var síðari viðureign þessara liða í spænska Konungsbikarnum.

Barcelona vann fyrri leikinn örugglega 3-0 og er því komið áfram í keppninni. Frank Rijkaard, þjálfari Barcelona, hvíldi marga í leiknum í kvöld.

Börsungar voru komnir 2-0 yfir eftir aðeins tíu mínútna leik en Ezquerro skoraði bæði mörkin. Alcoyano náði hinsvegar að skora tvívegis í seinni hálfleik, jöfnunarmarkið kom á 90. mínútu leiksins.

Alcoyano leikur í neðri deildum Spánar og var hálf tómlegt á heimavelli Barcelona þrátt fyrir að 30 þúsund manns hafi verið meðal áhorfenda. Völlurinn tekur hinsvegar 100 þúsund manns.