Klúbbakvöld

Trevor Loveys, einn þekktra plötusnúða hjá Ministry of Sound, klúbbnum og plötufyrirtækinu, spilar í Sjallanum, Akureyri á föstudagskvöld og á Tunglinu á laugardagskvöld. Hann er þekktastur fyrir að hafa verið hluti af tvíeykinu Switch sem hefur endurhljóðblandað fjölda laga, m.a. eftir Chemical Brothers og Róisin Murphy.

Ásamt honum koma fram plötusnúðarnir Ghozt, Trix og Mr. Cuellar. Barcode og Flex Music hafa löngum fært landanum klúbbakvöld mánaðarlega, þar sem spiluð er neðanjarðar danstónlist. Seinast fluttu Flex Music Adam Freeland inn. Þeir dansþyrstu ættu því ekki að láta þetta framhjá sér fara um helgina, en 2.500 krónur kostar inn. Miðar eru seldir við dyrnar. -kbs