Sylvinho vill vera um kyrrt hjá Barca

Brasilíski bakvörðurinn Sylvinho vill ólmur vera áfram í herbúðum Barcelona en hann er einn þeirra fjölmörgu leikmanna sem er sagður vera á leið frá félaginu.

Sylvinho segist gjarnan vilja sleppa við þá uppstokkun sem er framundan hjá félaginu.

„Sannleikurinn er sá að mér líður mjög vel hér í borginni. Mér finnst ég tengdur félaginu og auk þess er öll mín fjölskylda hér," sagði Sylvinho sem er 34 ára gamall en hann gekk til liðs við félagið árið 2004.

„Ef ég verð hér áfram mun ég hafa varið lengstum tíma hjá Barcelona af öllum þeim félögum sem ég hef leikið fyrir. Það væri mér mikilvægt að ná því."

Honum líst einnig vel á að Pep Guardiola sé að fara að taka við félaginu. „Fólki líkar vel við hann og hann hefur verið að vinna frábært starf með varalið Barcelona. Við höfum nokkrum sinnum æft með varaliðinu og þar með Guardiola. Mér finnst hann hafa verið mjög vandvirkur og unnið gott starf."