Kjallarabarn vakið af dá­svefni

Læknar í Austurríki eru að vekja hina nítján ára gömlu Kerstin Fritzl af dásvefni sínum.

Henni hefur verið haldið sofandi í öndunarvél síðan hún losnaði úr kjallaraprísund föður síns og afa.

Þar hafði hún lengi verið fárveik og móðir hennar, Elísabet, tókst harkalega á við föður sinn um að koma henni á sjúkrahús.

Það var ekki fyrr en hún féll í dá sem hann loks gaf sig. Henni var lengi ekki hugað líf, en læknar segja nú að henni sé að skána.

Því er verið að minnka lyfjaskammtinn til þess að vekja hana hægt og rólega af dásvefninum. Læknar segja ómögulegt að spá um á hve löngum tíma það verði gert.