Lewis setur spurningamerki við árangur Bolt

Bandaríska frjálsíþróttagoðsögnin Carl Lewis er heldur varkár í yfirlýsingum sínum um árangur Usain Bolt á hlaupabrautinni í ár.

Bolt varð á Ólympíuleikunum í Peking fyrsti maðurinn til að vinna gull í 100, 200 og 4x100 metra hlaupum karla síðan að Lewis gerði það í Los Angeles árið 1984. Bolt varð hins vegar fyrsti maðurinn til að setja heimsmet í öllum þremur greinunum á einum og sömu leikunum.

Lewis gagnrýnir hins vegar lyfjastefnu frjálsíþróttasambandsins í heimalandi Bolt, Jamaíku. Sambandið framkvæmir ekki tilviljunarkennd lyfjapróf, líkt og í Bandaríkjunum.

„Þegar ég er spurður um Bolt segi ég að hann gæti hugsanlega orðið besti íþróttamaður allra tíma," sagði Lewis. „En að hlaupa 10,03 sekúndur á einu ári og 9,69 á því næsta - ef maður setur ekki spurningamerki við það þegar íþróttin hefur það orðspor á sér sem hún hefur nú, væri maður bjáni. Svo einfalt er það."

„Ég er stoltur af Bandaríkjunum því það er með besta lyfjaeftirlitið í heimi. Í Jamaíku geta menn æft mánuðum saman án þess að fara í lyfjapróf."

„Það er enginn að ásakast Bolt en það er ekki hægt að búa við aðrar reglur og krefjast svo sömu virðingarinnar."