"Við bara rifum okkur upp á rassgatinu og gerðum þetta eins og karlmenn núna," sagði Gunnar Einarsson, hetja Keflvíkinga í oddaleiknum í kvöld.
Gunnar var stigahæstur Keflvíkinga með 23 stig, hitti vel og dreif sína menn áfram á báðum endum vallarins. Í viðtali við Stöð 2 Sport eftir leikinn sagðist hann blása á fréttir af óeiningu í herbúðum liðsins.
"Það er bara bull. Það er flottur mórall í þessu liði og gaman að koma á hverja einustu æfingu," sagði Gunnar.
Hann segir Keflavíkurliðið hafa lagt upp með ranga hernaðaráætlun gegn ÍR í upphafi einvígisins.
"Við vorum að spila vitlaust á þá þarna í byrjun og spila svæðisvörn, en við skiptum alveg í maður á mann í síðustu þremur leikjunum og árangurinn liggur í augum uppi," sagði Gunnar.
Hann segir stemminguna í Sláturhúsinu í kvöld hafa verið rafmagnaða fyrir leikinn og sagðist hafa fundið í hvað stefndi.
"Ég fann það um leið og ég gekk inn í húsið í kvöld að ég ætti eftir að eiga stórleik. Þetta var bara einn af þessum dögum þar sem allt er ofaní. Siggi sýndi mér traust í síðustu þremur leikjum og ég er enn í fullu fjöri - þið sáuð hvernig það fór í kvöld," sagði Gunnar brattur.