McLaren stjórinn afskrifaði titilinn í lokahringnum

Martin Whitmarsh, framkvæmdarstjóri McLaren segir að hann hafi afskrifað titilinn stundarkorn í brasilíska kappakstrinum. Hamilton nældi í titilinn á síðasta beygjukafla brautarinnar.

"Við vissum að Hamilton þyrfti að fara framúr einum bíl. Hann átti í vandræðum með að ná Vettel, en við vissum af Timo Glock á þurrdekkjum á blautri braut. En ég var farinn að efast um að Hamilton tækist að ná honum í síðasta hring", sagði Whitmarsh.

Regnskvetta af himnum ofan gerði það að verkum að Glock skautaði um brautina og Hamilton náði að smokra sér framúr. Glock fór 20 sekúndum hægar síðasta hringinn.

"Við sögum Hamilton að taka ekki áhættu í slagnum við Vettel, því Glock væri skammt undan. Við skoðuðum GPS tækið til að sjá stöðuna og það var sannarlega mjótt á munum að þetta gengi upp. Glock var að tapa tíma, dekkin kólnuðu hjá honum og hann tapaði gripi. Ég spáði í það hvort við hefðum klúðrað titilinum.... en svo sá ég á tímatökuskjánum að Glock varð á eftir okkur og Hamilton var meistari."

"Hamilton hélt haus allan tímann og úrslitin í mótinu voru svo sannalega ekki eftir bókinni. Þetta var mögnuð stund", sagði Whitmarsh.