„Það stóð alls ekki til að fara strax aftur í þjálfun. Þetta kom fljótt upp og ég skellti mér á þetta," sagði Teitur Örlygsson í viðtali við útvarpsþáttinn Skjálfanda á X-inu. Teitur hefur verið ráðinn þjálfari Stjörnunnar.
Samningur Teits gildir út þessa leiktíð og verða málin síðan endurskoðuð í vor. „Eins og staðan er í dag er fyrsta markmið að komast upp úr fallsæti. Hvað gerist síðan veit maður aldrei. Þetta er svo fljótt að gerast. Stefnan er að ná mönnum upp á tærnar og fá þá til að hafa gaman að þessu," sagði Teitur sem sagði að það væri ekki langt í úrslitakeppnina.
Teitur mun ekki stýra Stjörnunni gegn FSu í kvöld en fylgist með af bekknum. „Ég hlakka til að sjá þetta í kvöld, þetta verður gríðarlega mikilvægur leikur," sagði Teitur.
„Ég hef ekkert séð liðið í vetur en ég tapaði tvisvar fyrir þeim í fyrra. Liðið er reyndar talsvert breytt en ég hef fulla trú á þessum strákum. Ég tel að þetta lið eigi að geta betur en það hefur verið að sýna."