Barcelona vill Arshavin

Zenit frá Pétursborg hefur staðfest að Barcelona hafi áhuga á að fá Andrei Arshavin sem hefur slegið í gegn með Rússlandi á Evrópumótinu.

Börsungar hafa víst stigið fyrsta skrefið í að krækja í þennan 27 ára leikmann. Búist er við að þeir þurfi að reiða fram um 25 milljón evrur fyrir hann.

Arshavin var í leikbanni fyrstu tvo leiki Rússa en átti síðan mjög góða leiki. Hann lék frábærlega með Zenit frá Pétursborg síðasta tímabil en liðið vann Evrópukeppni félagsliða.

Arshavin hafði áður sagt að draumur sinn væri að spila á Spáni og þar væri Barcelona óskaliðið.