Montin Atómstöð í útrás

Lag Atómstöðvarinnar, Think No, er að finna á safnplötunni Riot on Sunset vol. 14 sem bandaríska útgáfufyrirtækið 272 Records gefur út.

„Þeir sögðu að lagið væri grípandi og að þeir hefðu trú á að það fengi spilun úti," segir Óli Rúnar Jónsson úr Atómstöðinni.

Think No er fyrsta lag safnplötunnar og að sama skapi það fyrsta sem er gefið út á smáskífu. Að sögn Óla Rúnars sendu 272 Records þeim félögum tölvupóst eftir að hafa heyrt lagið á Myspace-síðu sveitarinnar og heillast upp úr skónum. „Það er mikill heiður að fá að vera með í þessu og við erum gríðarlega montnir af því að vera með lag númer eitt, við bjuggumst alls ekkert við því," segir hann.

Safnplatan er til sölu á vefsíðunni Amazon.com og í plötubúðum í Kaliforníu auk þess sem henni hefur verið dreift á fjölda net- og háskólaútvarpsstöðva í Bandaríkjunum. Hefur lag Atómstöðvarinnar þegar fengið spilun á þó nokkrum útvarpsstöðvum.

Óli játar að góð tækifæri gætu falist í þessari nýju útgáfu, þar á meðal útgáfusamningur og spilamennska erlendis. „Við sjáum til hvernig þetta lendir. Alla vega eru talsvert meiri möguleikar en áður."

Hljómsveitin hefur aldrei spilað erlendis en vonast til að einhver tækifæri bjóðist núna. „Það var hugmyndin að fara til Evrópu fyrst en maður veit ekkert hvað gerist eftir þetta," segir hann.