Norskur njósnari stýrir fjárfestingasjóði

Norski njósnarinn Arne Treholt hefur tekið að sér að stýra fjárfestingasjóði sem rekinn verður eftir sharia lögum múslima.

Sjóðurinn mun einkum fjárfesta í orkugeiranum í fyrrverandi Sovétlýðveldum og í Asíu. Arna Treholt sem nú er 65 ára gamall er fyrrverandi embættismaður í Noregi.

Hann var handtekinn árið 1984 fyrir njósnir fyrir Sovétríkin. Árið eftir var hann dæmdur í tuttugu ára fangelsi fyrir föðurlandssvik njósnir fyrir Sovétríkin og Írak.

Hann var náðaður árið 1992 og fluttist til Rússlands Þar stofnaði hann fyrirtæki ásamt fyrrverandi hershöfðingja í KGB, rússnesku leyniþjónustunni.

Treholt býr nú á Kýpur en viðskipti hans eru að mestu leyti í Rússlandi. Sjóðurinn sem hann nú mun stýra verður með höfuðstöðvar í Bahrain.