Fjármálafyrirtækin rjúka upp á Wall Street

Gengi hlutabréfa í hálfopinberu fasteignalánasjóðunum Fannie Me og Freddie Mac sem enn eru í eigu almennra fjárfesta ruku upp um tæp hundrað prósent við upphaf viðskipta á bandarískum hlutabréfamarkaði í dag. Gengi annarra fjármálafyrirtækja beggja vegna Atlantsála hefur sömuleiðis hækkað mikið eftir að bandarísk stjórnvöld tilkynntu að þau væru að búa til nokkurskonar ruslatunnu fyrir svokölluð undirmálslán og önnur slík útlán sem nú eru næsta verðlaus. Stefnt er að því að búa til sjóð vestra sem sem á að kaupa þessi lán af bönkunum. Þá ætla bæði Bandaríkjamenn og Bretar að banna skortsölur með hlutabréf. Seðlabankar víða um heim hafa auk þess dælt miklu magni peninga inn á fjármálamarkaði til að leysa úr lausafjárþurrðinni, sem plagað hefur fjármálamarkaði frá í fyrrasumar. Bandarískir ríkið tók yfir mestan hluta fasteignalánasjóðanna í byrjun mánaðar og hrundi gengi þeirra um rúm níutíu prósent. Gengi hlutabréfa þeirra telur nú í sentum í stað tugum dala líkt og fyrir nokkrum mánuðum. Dow Jones-hlutabréfavísitalan hækkað um 2,48 prósent og Nasdaq-vísitalan um 5,11 prósent í byrjun dag. Þetta er svipuð hækkun og á evrópskum hlutabréfamörkuðum í dag.