Djassinn dunar

Jazzhátíð Reykjavíkur heldur áfram í kvöld með forvitnilegri dagskrá.

Theo Bleckman er búinn að vera áberandi í tónlistarlífi New York frá því hann fluttist þangað fyrir fimmtán árum. Hann verður líka áberandi á tónleikum í Fríkirkjunni í kvöld þar sem hann spilar og syngur með Mógil, íslensk-belgísku sveitinni. Hann hikar ekki við að blanda saman stefnum og straumum í tónlist bæði með yfirburða raddtækni sinni og rafrænum hjálpartækjum. Af samstarfsfólki hans má nefna Laurie Anderson, Anthony Braxton, Philip Glass, Meredith Monk og Michael Tilson Thomas. Hann vinnur úti um allan heim og kemur fram með listamönnum af ýmsu tagi.

Íslensk-belgíska hljómsveitin Mógil samanstendur af Heiðu Árnadóttur söngkonu, Hilmari Jenssyni gítarleikara, Joachim Badenhorst klarinettuleikara og Ananata Roosens fiðluleikara. Mógil er að fagna útkomu geisladisk síns Ró sem er nýkominn út á Íslandi og verður gefinn út í Evrópu 28. september af belgísku útgáfunni Radical Duke. Lögin eru samin af hljómsveitarmeðlimum og textar eru ýmist íslenskar þjóðvísur eða eftir Heiðu.

Tónleikarnir fara fram í Fríkirkjunni í kvöld klukkan 20.

Jóel Pálsson og Ómar Guðjónsson koma svo fram með tvískipta dagskrá á Organ í kvöld klukkan 22 sem lögð er undir efni af nýlegum diskum þeirra, Varpi Jóels og Fram af Óskars. Þar verða með vaskir sveinar í báðum deildum. Síðla kvölds verður svo sitthvað að bíta og brenna á Bitboxinu á Glaumbar.