Fékk samning í Danmörku

„Ég er að sjálfsögðu alveg í skýjunum með þetta," segir tónlistarmaðurinn Rúnar Eff sem hefur tryggt sér dreifingarsamning í Danmörku í kjölfar góðs gengis í raunveruleikaþættinum All Stars. Rúnar komst alla leið í úrslit í þættinum en kór hans náði á endanum ekki að tryggja sér sigur.

„Þetta gekk rosa vel. Að flestra mati vorum við mun sterkari hópurinn sönglega séð. En hinn kórinn var með mun sterkara málefni að berjast fyrir, eða leiksvæði fyrir munaðarleysingja, á meðan okkar kór var að berjast fyrir hljóðstúdíói í Sönderborg," segir Rúnar Eff, en sigurlaun keppninnar runnu öll til góðgerðamála.

Tvö lög Rúnars verða gefin út á smáskífu í Danmörku á næstunni, annars vegar Aha-lagið Take On Me, sem kom út á síðustu sólóplötu hans, og hins vegar You sem er einnig á plötunni. Rúnar hefur jafnframt sent frá sér nýtt jólalag sem nefnist Jólin koma. „Ég samdi þetta fyrir einhverjum sjö árum. Ég ætlaði alltaf að gefa þetta út fyrir jólin en hafði aldrei tíma," segir hann.

Rúnar flytur til Íslands á sunnudag en verður þó með annan fótinn í Kaupmannahöfn vegna söngkennaranáms síns. Mun hann nýta tækifærið og fylgja sólóferli sínum eftir þar í landi með tónleikahaldi.

Danskir fjölmiðlar hafa haft mikinn áhuga á honum vegna þátttökunnar í All Stars og til að mynda verður hann gestur þáttarins Go"Aften Danmark á TV2 í janúar, sem er nokkurs konar dönsk útgáfa af Kastljósi eða Íslandi í dag.

Næstu tónleikar Rúnars hér á landi verða á Glerártorgi 22. desember og þar mun hann væntanlega koma öllum í jólaskap með nýja jólalaginu sínu. Hann hefur einnig verið bókaður á menningarnótt í ágúst á næsta ári þar sem hann stígur síðastur á sviðið með hljómsveit sinni. - fb