Nuddari með styrktartónleika

Fjöldi tónlistarmanna kemur fram á styrktartónleikum fyrir samtökin Umhyggju á Nordica hóteli 28. september.

Á meðal þeirra sem stíga á svið á tónleikunum verða Ragnar Bjarnason, Egill Ólafsson, Stefán Hilmarsson, Sigga Beinteins, Friðrik Ómar, Regína Ósk og Hörður Torfason.

Arnhildur S. Magnúsdóttir, nuddari og jógakennari, skipuleggur tónleikana með aðstoð tónlistarmannsins Geirs Ólafssonar sem treður einnig upp. Þetta er í fyrsta sinn sem hún kemur nálægt tónleikahaldi en lætur það ekki aftra sér. „Ég er búin að ganga með þetta í maganum síðan í fyrrahaust,“ segir Arnhildur. „Ég hef verið að vinna með fólki á sambýlum sem er búið að vera langveikt og það er lítið gert fyrir þetta fólk. Mér finnst þetta alveg sjálfsagt og það mættu fleiri gera þetta.

Arnhildur greindist sjálf með krabbamein sem hún er nú laus við og veit því vel um hvað málið snýst. „Það er ekkert sjálfgefið að sleppa svona auðveldlega og ég þakka fyrir að fá að vera lifandi,“ segir hún og er jafnframt þakklát þeim tónlistarmönnum sem samþykktu að gefa vinnu sína. Hvetur hún almenning til að leggja málefninu lið og mæta á tónleikana, en Umhyggja er félag sem vinnur að bættum hag sjúkra barna og fjölskyldna þeirra.

Miðasalan fer fram á midi.is og er miðaverð 2.000 krónur. Tónleikarnir hefjast klukkan 20.