Thiago í gítarkeppni á netinu

Brasilíski gítarleikarinn Thiago Trinsi, sem býr á Ólafsfirði, er á meðal þátttakenda í alþjóðlegu gítarkeppninni Dean Guitar Shredder Contest USA sem fer fram á netinu.

Þátttakendum var gert að senda einnar mínútu langt myndband sem sýndi gítarsnilli þeirra og síðan yrði þeim gefin einkunn á netinu. Thiago er þegar kominn í gegnum hundrað myndbanda niðurskurðinn og biðlar nú til Íslendinga að hjálpa sér að komast enn lengra, því fimmta nóvember verða 25 bestu gítarleikararnir valdir. „Ég tel mig eiga góða möguleika vegna þess að miðað við ummælin sem ég hef fengið á spjallsíðu keppninnar er ég með eitt besta myndbandið," segir Thiago, sem hefur starfað sem tónlistarkennari hér á landi í þrjú ár. „Fólk víða að úr heiminum hefur verið að kjósa mig og með hjálp Íslendinga get ég vonandi náð enn þá lengra í keppninni."

Í myndbandinu spilar Thiago bút úr lagi sínu Fire sem verður á nýrri sólóplötu sem hann er með í smíðum. Sýnir hann þar mikla fingrafimi og er greinilegt að þar er enginn nýgræðingur á ferð. Þeir sem vilja leggja Thiago lið í gítarkeppninni geta gefið myndbandinu hans einkunn á slóðinni http://deanguitars.com/shredder/viewProfile.php?id=1431.

Fimmtánda nóvember verður besti gítarleikarinn síðan valinn og fær hann verðlaun að verðmæti um 1,2 milljónir króna. Á meðal þeirra sem sitja í dómnefndinni verða Eric Peterson, gítarleikari Testament, og Vinnie Paul, trommari Pantera.

- fb