Nadal sló Federer af toppnum

Spænski tenniskappinn Rafael Nadal tryggði sér í gær sæti í undanúrslitaleiknum á Cincinnati masters mótinu í tennis. Sigurinn þýðir að Nadal hefur tryggt sér efsta sætið á stigalista Alþjóða Tennissambandsins.

Þar með hefur Svisslendingurinn Roger Federer misst toppsætið á listanum í fyrsta skipti í fjögur og hálft ár. Nadal hafði verið í öðru sæti á eftir Federer í 158 vikur í röð, eða síðan í júlí árið 2005.

Federer féll úr leik á Cincinnati mótinu á fimmtudaginn og tapaði auk þess fyrir Nadal í úrslitaleik opna franska meistaramótsins og síðar úrslitaleik Wimbledon mótsins á dögunum. Fyrir vikið er Spánverjinn nú búinn að tryggja sér toppsætið á heimslistanum.