Hamilton í hóp ökumanna á Wembley

Bretinn Lewis Hamilton verður í hópi ökumanna sem kemur við sögu á stórmóti kappakstursökumanna á Wembley 14. desember. Þar verður keppt á malbikaðri braut sem lögð verður yfir grasvöllinn.

Hamilton mun aka Formúlu 1 bíl á brautinni og mun auk þess spyrna Mercedes Benz sportbíl gegn sprettharðasta reiðhjólamanni Breta. Atriði með Hamilton verður meðal sýningaratriða á mótinu, þar sem fjöldi Formúlu 1 ökumanna keppir í útsláttakeppni á ýmis konar farartækjum á samhliða braut á malbiki.

Þetta mót hefur verið haldið í mörg ár og er einskonar uppskeruhátið fyrir ökumenn og meðal keppenda verður Michael Shumachher, Seabstian Vettel, David Coulthard og Jenson Button úr röðum ökumanna. Heimsmeistarinn í rallakstri, Sebastian Loeb mætir á svæðið og heldur uppi heiðri Frakklands en mótið er einskonar liðakeppni á milli landa.

Mótið er í beinni útsendingu á Stöð 2 Sport, en auk kappaksturs er fjöldi sýningaratrið á mótinu þar sem áhættuökumenn koma við sögu.

"Ég get ekki keppt í mótinu, þar sem ég þarf að vera viðstaddur útnefningu BBC á íþrótttamanni ársins", sagði Hamilton, en skipuleggjendur mótsins fögnuðu því þó að hann mætir og verður viðburðurinn notaður sem vettvangur fyrir Breta að fagna meistaratitili Hamiltons.