Ragna gaf úrslitaleikinn

Ragna Ingólfsdóttir hætti í morgun við að spila úrslitaviðureignina á alþjóðlegu badmintonmóti í Grikklandi vegna meiðsla.

Hún tryggði sér í gær sæti í úrslitunum með sigri á víetnömskum leikmanni í undanúrslitum. Í morgun ákvað hún svo í samráði við þjálfara sinn og sjúkraþjálfara að spila ekki í úrslitaviðureigninni.

Eftir því sem fram kemur í fréttatilkynningu frá Badmintonsambandinu hafa verkir í fæti verið að ágerast að undanförnu og hún hafi því neyðst til að stoppa nú.

Engu að síður fær hún dýrmæt stig fyrir árangurinn sem kunni að fleyta henni ofar á heimslistanum, jafnvel um 4-6 sæti. Næsti heimslisti verður gefinn út 27. desember.