Örn í undanúrslit og Íslandsmet hjá Ragnheiði

Örn Arnarson tryggði sér naumlega sæti í undanúrslitum 100 metra flugsunds. Jakob Jóhann Sveinsson og Ragnheiður Ragnarsdóttir komust ekki áfram í sínum greinum.

Örn var aðeins tveimur hundraðshlutum úr sekúndu frá ársgömlu Íslandsmeti sínu í greininni en hann synti á 52,69 sekúndum og kom í mark í 16. sæti.

Ragnheiður varð í 23. sæti í 100 metra skriðsundi og bætti Íslandsmet sitt í greininni um 0,66 sekúndur. Nýja Íslandsmetið er 55,29 sekúndur.

Þá varð Jakob Jóhann í 36. sæti í 100 metra bringusundi er hann synti á 1:01,51 mínútu. Hann var rúmri hálfri sekúndu frá Íslandsmeti sínu í greininni.