McLaren fær háa sekt

FIA hefur komist að þeirri niðurstöðu að sekta McLaren liðið í Formúlu-1 um hundrað milljónir dollara vegna njósnamálsins. Þá verða stig dregin af liðinu. Hinsvegar mun úrskurðurinn ekki hafa nein áhrif í keppninni um heimsmeistaratitil ökumanna.

Þessi sekt er sú hæsta í sögu akstursíþrótta. Eftir þessa niðurstöðu er ljóst að Ferrari fær meistaratitil bílasmiða. FIA ætlar að gera nánar grein fyrir niðurstöðu sinni á morgun.

Eins og áður segir mun þessi niðurstaða ekki hafa áhrif á baráttu Lewis Hamilton og Fernando Alonso um heimsmeistaratitilinn.