Eiður Smári hefur áhyggjur af meiðslum sínum

Miklar vangaveltur hafa verið um framtíð Eiðs Smára Guðjohnsens hjá Barcelona en þær eru allar í biðstöðu vegna hnémeiðsla hans. Eiður Smári hefur áhyggjur af meiðslunum því að bati er enginn og sprautumeðferð hefur ekki skilað neinum árangri. Eiður Smári vonast til að þurfa ekki að fara undir hnífinn.

„Allir læknar sem ég tala við eru alveg á því að þetta ætti ekki að vera neitt sem muni halda aftur af mér til lengdar en ég hef ekki getað æft neitt til þessa," segir Eiður Smári í viðtali við Stöð 2. „Mér finnst ég ekki vera klár í það næstu vikurnar, allavega ekki miðað við stöðuna í dag.

Eiður Smári segist ekki hafa heyrt af því að einhver tilboð hafi borist í hann. Mikið hefur verið talað um það í dag að ensk lið séu búin að gefast upp á Eiði Smára vegna hárra launakrafna hans en hann segir að ekkert sé til í þeim orðrómi.

Ýtið á „Spila" til að sjá viðtalið í heild sinni.