Enn þrengir að bandarískum lánafyrirtækjum

Gengi bréfa í bandaríska fjármálafyrirtækinu Countrywide Financial Corporation féll um 17,5 prósent í Bandaríkjunum í dag. Markaðir vestanhafs opna senn og bíða fjárfestar eftir því hvort lækkun á hlutabréfamarkaði þar í landi haldi áfram. Gengi bréfa í fyrirtækinu hefur lækkað um rúm 30 prósent síðan á vordögum.

Að sögn fréttastofu Associated Press í dag búast fjárfestar við enn frekari lækkunum á bandarískum hlutabréfamarkaði. 

Country Financial er eitt stærsta veðlánafyrirtæki Bandaríkjanna og selur þau áfram til fjárfesta í formi skuldabréfa.

Fyrirtækið sendi frá sér tilkynningu í dag þar sem fram kemur að það hafi orðið fyrir „ófyrirséðri röskun á starfsemi sinni". Var þar átt við, að erfiðara hafi gengið að selja áfram skuldabréf í skugga samdráttar á bandarískum fasteignamarkaði og hafi fyrirtækið því dregið mjög úr sölu þeirra í stað þess að lækka verðið.

Vanskil einstaklinga á bandarískum fasteignamarkaði hafa aukist mikið á árinu, að sögn bandaríska viðskiptatímaritsins Fortune, sem bætir við að 3,7 prósent lántaka hjá Country Financial hafi lent í vanskilum á öðrum ársfjórðungi. Á sama tíma í fyrra var hlutfallið 1,5 prósent.