Ólíklegt að ákært verði

Ólíklegt er talið að hægt verði að fá opinbert mál höfðað á Íslandi gegn meintum morðingja Ashley Turner, flugliða sem myrt var á varnarsvæðinu á Miðnesheiði fyrir tæpum tveimur árum. Slíkt væri líkast til brot á ákvæðum marréttindasáttmála að mati íslenskra lögspekinga.

Fram kom í fréttum Stöðvar 2 í gærkvöldi að fjölskylda Turner ætlaði að kanna það hjá íslenskum yfirvöldum hvort hægt yrði að höfða mál gegn meintum morðingja hér á landi. Flugliðinn Calvin Hill var handtekinn og ákærður, en Turner hafði átt að bera vitni gegn honum í þjófnaðarmáli. Herréttur í Washington sýknaði Hill af morðákærunni í síðasta mánuði.

Samkvæmt upplýsingum fréttastofu bendir margt til þess að rannsókn herlögreglu hafi verið ábótavant og sagði bróðir Turner, Jason, í samtali við fréttastofu í gær að hann teldi sönnunargögn benda sterklega til sektar Hills og því ætlaði fjölskyldan að reyna þessa leið. Ekki væri hægt að rétta aftur yfir Hill fyrir sama morð eftir sýknudóm samkvæmt bandarískum lögum.

Þeir lögspekingar sem fréttastofa hefur rætt við í dag telja afar ólíklegt að mál yrði höfðað. Málið hafi farið rétta leið innan bandaríska kerfisins auk þess sem það yrði það líkast til brot á ákvæðum mannréttindasáttmála að rétta aftur yfir honum.

Samkvæmt ákvæðum við Varnarsamninginn frá 1951 óska Íslendingar ekki lögsögu í málum sem ekki hafi verið sérstaklega áskilin nema um væri að tefla sakir sem hefðu sérstaka þýðingu fyrir Ísland. Morðið á Ashley var á forræði bandarískra rannsóknaryfirvalda frá fyrsta degi og samkvæmt upplýsingum Stöðvar 2 var engin athugasemd gerð við það af hálfu íslenskra yfirvalda. Bandaríkjamenn afþökkuðu aðstoð frá íslensku tæknifólki við rannsóknina.

Hjá utanríkisráðuneytinu fengust þær upplýsingar í dag að ef fyrirspurn bærist frá Turner-fjölskyldunni yrði hún skoðuð ítarlega.