Björgvin og Dagný sigursæl

Skíðamóti Íslands lauk í Hlíðarfjalli á Akureyri í dag en mótið hefur staðið yfir síðan á fimmtudag. Fátt var um óvænt úrslit í alpagreinunum. Dalvíkingurinn Björgvin Björgvinsson varð Íslandsmeistari í stórsvigi karla og hann hampaði einnig Íslandsmeistaratitli í svigkeppninni.

Dagný Linda Kristjánsdóttir varð Íslandsmeistari í Stórsvigi kvenna. Sigur Dagnýjar var öruggur en Akureyringar tylltu sér í þrjú efstu sætin. Sigur Dagnýjar í alpagreinunum var tvöfaldur en hún sigraði einnig í svigi.

Óvænt úrslit urðu þó í 15 km. göngu karla þar sem Sigurgeir Svavarsson frá Akureyri sigraði en Sigurgeir varð síðast Íslandsmeistari í þessari grein fyrir 13 árum. Öll úrslit landsmótsins er að finna á vef skíðasambandsins, skidi.is