Capello sagður hafa sagt af sér hjá Real Madrid

Spænsk útvarpsstöð hafði eftir heimildamanni sínum í dag að ítalski þjálfarinn Fabio Capello hefði sagt starfi sínu lausu hjá Real Madrid. Talsmaður Real vildi ekki staðfesta þetta og segir þjálfarann muni stýra liðinu gegn Bayern í Meistaradeildinni á morgun. Hann vildi hinsvegar ekki staðfesta að Capello yrði við stjórnvölinn þegar Real mætir grönnum sínum í Atletico um næstu helgi.

"Fréttir af því að Capello væri búinn að segja af sér eru með öllu ósannar og eru satt best að segja ekki að koma á góðum tíma nú þegar liðið er að undirbúa sig fyrir mjög mikilvægan leik gegn Bayern Munchen í Meistaradeildinni," sagði í yfirlýsingu frá félaginu.

Talsmaður félagsins sagðist þó ekki geta fullyrt að Capello yrði við stjórnvölinn þegar Real mætir grönnum sínum í Atletico í spænsku deildinni og herma fregnir frá Spáni að þjálfari ungmennaliðs Real, Michel, muni taka við af Capello á næstu dögum.