Pelosi segir Bush skorta heimild til innrásar

Nancy Pelosi, leiðtogi demókrata í fulltrúadeild bandaríska þingsins, sagði á blaðamannafundi í gærkvöldi að George W. Bush, forseta Bandaríkjanna, skorti heimild til þess að ráðast á Íran. Hún sagði að til þess þyrfti hann samþykki þingsins.

Pelosi benti einnig á að Bush segðist styðja viðræður við Íran til þess að leysa deiluna og að hún ætlaði sér að sjá til þess að hann færi samningaleiðina. Fulltrúadeildin ræðir nú tillögu sem fordæmir fjölgun hermanna í Írak. Verði tillagan samþykkt er hún þó ekki bindandi fyrir Bush.