Serbía: Ólíklegt að þjóðernissinnar komist í ríkisstjórn

Forvígismenn flokks þjóðernissinnaðra Serba eiga ekki von á því að þeim verði boðið að mynda ríkisstjórn þótt þeir hafi unnið stórsigur í þingkosningum í gær. Leiðtogi flokksins situr í fangelsi í Haag í Hollandi þar sem rétta á yfir honum fyrir stríðsglæpi.

Vojislav Seselj, leiðtogi þjóðernissinna, er ákærður fyrir stríðsglæpi í stríðinu á Balkanskaga. Hann varð þriðji í baráttunni um serbneska forsetaembættið árið 2002. Ári síðar gaf hann sig fram við stríðsglæpadómstólinn í Haag. Síðan þá hefur seselj gagnrýnt þá málsmeðferð sem hann hefur fengið. Hann hefur meðal annars farið í mótmælasvelti þar sem ekki var orðið við kröfu hans um að hann fengi skipaða nýja verjendur.

Flokkur Seseljs hlaut töluvert fylgi í síðustu kosningum. Fyrstu tölur nú benda til þess að flokkurnn hafi bætt við sig einu prósentustigi og hafi hlotið tæp 30% atkvæða.

Enginn flokkur eða flokkabandalag hlaut hreinan meirihluta í kosningunum í gær og því verður að mynda samsteypustjórn. Telja stjórnmálaskýrendur í Serbíu það afar ólíklegt að fylgið frá í gær fleyti þjóðernissinnum í ríkisstjórn.

Núverandii stjórnarflokkar geti haldið áfram samstarfi sínu náist samkomulag við tvo minni flokka. Þeir flokkar sem hafa haldið í stjórnartaumana síðustu ár eru mið- og hægriflokkar sem stefna á inngöngu í Evrópusambandið.

Nýrri ríkisstjórn bíða fjölmörg verkefni. Gera þarf umbætur í efnahagsmálum, bæta samskiptin við stríðsglæpadómstólinn í Haag, sem hafa tafið aðildarviðræður við ESB, og ræða framtíð Kósóvó-héraðs.

Javier Solana, utanríkismálastjóri ESB, vonar að greiðlega gangi að mynda nýja ríkisstjórn þrátt fyrir sigur þjóðernissinna. Hann segir of snemmt að spá fyrir um hvaða áhrif úrslitin hafi á viðræður um framtíð Kósóvó-héraðs.