Megrunartyggjó mögulega á markað

Án efa gleðjast margir jórtrarar yfir fréttum af því að megrunartyggjó sé væntanlegt á markað. Breskir vísindamenn þróa nú lyf hlaðið hormóni sem dregur úr svengdartilfinningu og hægt verður að nota í tyggjó eða jafnvel nefúða.

Um er að ræða fjölpeptíð úr 36 amínósýrum sem myndað er í gamma-frumum Langerhanseyja í briskirtlinum. Það dregur úr löngun í mat þar sem það sannfærir líkamann um að svengd sé ekki fyrir að fara. Rannsóknir hafa sýnt að hófsamleg notkun hormónsins geti minnkað matarneyslu fólks um 15 til 20% á degi hverjum.

Mýs sem hafa fengið hormónið hafa misst 15% líkamsþyngdar sinnar á viku. Vísindamenn í Bretlandi þróa nú lyf sem unnið er úr þessu hórmóni og telja að hægt verði að sprauta því í líkama fólks, líkt og insúlíni, inna átta ára.

Steve Bloom, prófessor sem hefur unnið að rannsókninni, segir vitað að ef maður borði 1% minna á hverjum degi tapaði maður tæpum þremu kílóum á hverju ári, það er nokkuð þyngdartap. Áhrif lyfsins væru því töluverð.

Lengri tíma markmið er að framleiða lyf úr hormóninu sem ekki þurfi að sprauta í líkamann. Það geti verið í formi nefspreys eða jafnvel tyggigúmmís. Þetta síðarnefnda gæti orðið að veruleika á næstu árum því bresku vísindamennirnir hafa nú fengið styrk frá þekktum, sjálfstæðum vísindasjóði í Bretlandi að jafnvirði rúmlega þrjú hundruð milljóna íslenskra króna til að þróa slíkt ásamt öðru. Þeir sem rannsakað hafa hormónið segja meðferð með því ekki hættulega og frekari rannsóknir muni leiða það í ljós.

Næringarfræðingar eru hins vegar á því að lyf séu ekki lausnin. Lisa Miles hjá samtökum breskra næringarfræðinga segir að fólk ætti ekki að bæta á sig í von um skjótvirka lausn síðar. Mestu skipti að koma í veg fyrir offitu með heilbrigðu líferni.