Ræðir ekki við fjölmiðla fyrst um sinn

Boðað var til blaðamannafunda á tveimur stöðum í Missouri í Bandaríkjunum í gærkvöldi til að fagna björgun tveggja unglingsdrengja úr klóm mannræningja. Báðum heilsast vel.

Shawn Hornbeck hafði verið saknað í fjögur og háflt ár en William Ownby, sem kallaður er Ben, hvarf á mánudaginn fyrir tæpri viku. Það var tilviljun ein sem réði því að lögregla fann þá í fyrradag. Lögreglumenn ráku augun í sendibíl á fimmtudagskvöldið sem passaði við lýsingu á bíl sem fór um þar sem Ownby var rænt. Heimild fékkst til leitar á heimili MIchaels Devlins, eiganda bílsins, og þar voru drengirnir, að því er virtist við góða heilsu. Devlin hefur verið ákærður fyrir mannrán og búist við fleiri ákærum.

Móðir Bens segist ekki hafa augun af honum nú og þakkar lögreglu björgunina.

Móðir Shawns sagði son sinn ekki vilja tjá sig sem stendur um dvölina hjá Devlin en það ætli hann að gera þegar hann treysti sér til þess, fyrr tali hann ekki við fjölmiðla. Fjölskyldan þurfi fyrst að takast á við atburði síðustu fjögurra ára og græða sárin.

Lögregla hefur ekki viljað tjá sig um málið umfram það sem þegar hefur komið fram. Enn þurfi að rannsaka fortíð og ferði Devlins og kanna bakgrunn hans. Enn sé mikið verk óunnið áður en hann verði dreginn fyrir dóm.