Bretar styðja framboð Japans til öryggisráðs

Bretar og Japanir samþykktu í dag að vinna saman að því að draga úr spennu í Asíu vegna kjarnorkuógnar Norður-Kóreu og Íran. Tony Blair og Shinzo Abe, forsætisráðherra Japans, áttu fund í dag og sagði Blair að hann myndi styðja framboð Japans til varanlegrar setu í öryggisráði Sameinuðu þjóðanna en Japan telur það vera nauðsynlegt skref til þess að vernda hagsmuni sína gegn Norður-Kóreu.

Abe er nú á fimm daga ferðalagi um Evrópu til þess að leita stuðnings við harðlínustefnu bandarískra og japanskra stjórnvalda gegn Norður-Kóreu.