Búast við tapi hjá AMR

Greiningaraðilar búast við að AMR, móðurfélag bandaríska flugfélagsins American Airlines, skili tapi á fjórða rekstrarfjórðungi ársins. Þetta er þvert á fyrri spá en þar var gert ráð fyrir hagnaði. Greint var frá því í gær, að FL Group hefði keypt sex prósenta hlut í AMR, móðurfélagi American Airlines fyrir ríflega 28 milljarða krónur.

Tapið getur numið allt að 40 sentum á hlut sem er talsvert verri afkoma en gert hafði verið ráð fyrir en sú spá gerði ráð fyrir allt að 50 senta hagnaði á hlut á tímabilinu, að sögn viðskiptaritsins Business Week.

Greiningaraðilar spá því hins vegar að AMR muni skila hagnaði á rekstrarárinu öllu. Gert er ráð fyrir 96 senta hagnaði á hlut sem er nokkru minna en gert hafði verið ráð fyrir áður. Meðalspá greiningaraðila á Wall Street hljóðaði upp á 1,77 dala hagnað áður en uppfærð afkomuspá var gefin út. 

Helsta ástæðan fyrir þessum viðsnúningi í spá greinendanna er hækkun á rekstrarkostnaði, eldsneytiskostnaði og kostnaði við hvern farþega auk þess sem álögur hafa aukist vegna tafa á flugi. Þá munu tekjur  flugfélagsins ekki hafa aukist í takt við spár manna á Wall Street í Bandaríkjunum.

Gengi bréfa í AMR hefur hækkað um 62 sent á hlut eða um 2 prósent í dag og stendur í 30.87 dölum á hlut.