Gildir einu hvort skilgreint sem borgarastyrjöld

Tilvonandi varnarmálaráðherra Bandaríkjanna segir Bandaríkjamenn ekki á sigurbraut í Írak. Fráfarandi framkvæmdastjóri Sameinuðu þjóðanna segir ástandið þar verra en borgarastyrjöld. En á meðan tekist er á um hvort borgarastyrjöld geisi þar deyja fjölmargir Írakar víðsvegar um landið á degi hverjum og fyrir ættingju þeirra gildir einu hvernig átökin í Írak eru skilgreind.

Erfiðlega hefur þó gengið að skera úr um svo óyggjandi sé hve margir Írakar hafi fallið í valinn frá innrás fjölþjóðlega herliðsins í Írak í mars 2003. Vitað er að rúmlega þrjú þúsund hermenn hafa fallið frá innrásinni, langflestir þeirra Bandaríkjamenn eða tæplega tvö þúsund og níu hundruð. Hundrað tuttugu og fimm Bretar hafa fallið og hundrað tuttugu og einn hermaður frá sextán öðrum þjóðlöndum.

Hið virta læknarit Lancet birti nýlega niðurstöður könnunar meðal Íraka og er því haldið fram að sex hundruð fimmtíu og fimm þúsund Írakar hafi fallið frá innrásinni og fram í júlí á þessu ári. Hópur sem kallar sig Iraq Body Count hefur hins vegar beitt þeirri aðferð að halda til haga þeim fjölda fallinna sem greint er frá í fjölmiðlum. Samkvæmt þessu korti má sjá að það er mat hópsins að tæplega fimmtíu þúsund Írakar hafi fallið frá innrásinni, þar af flestir í höfuðborginni, Bagdad, eða rúmlega þrjátíu og eitt þúsund.

Auk þessa hafa rúmlega tvö hundruð og þrjátíu þúsund Írakar hrakist frá heimilum sínum á þessu ári vegna átaka. Miðað við þetta þarf ekki að koma á óvart að talað sé um að borgarastyrjöld geisi í landinu og að Kofi Annan, fráfarandi framkvæmdastjóri Sameinuðu þjóðanna, segi ástandið jafnvel verra en borgarastyrjöld.

Robert Gates, tilvonandi varnarmálaráðherra Bandaríkjanna, kom fyrir nefnd öldungadeildar Bandaríkjaþings í dag en Bandaríkjaforseti þarf staðfestingu þings til að Gates geti tekið við af Donald Rumsfeld sem sagði af sér í síðasta mánuði. Gates segir Bandaríkjamenn ekki á sigurbraut í Írak. Hann telur Bush Bandaríkjaforseta gera sér grein fyrir að stefnubreytingar sé þörf.

Beðið er eftir tillögum sérstakrar nefndar Bandaríkjaþings um málefni Íraks sem skilar af sér á morgun. Reiknað er með að þar verði lagt til að bandarískir hermenn verði kallaðir heim frá Írak í áföngum á næsta eina og hálfa árinu. Stjórnvöld í Írak hafa ákveðið að senda fulltrúa til viðræðna við ráðamenn í nágrannalöndum til að undirbúa ráðstefnu um ástandið í Írak.