Erlent

Yfir tvö hundruð látnir eftir árásir í Bagdad

Ættingjar og vinir nokkurra fórnarlamba árásanna í gær
Ættingjar og vinir nokkurra fórnarlamba árásanna í gær MYND/AP

Tala látinna eftir hrinu árása í Sadr-hverfi í Bagdad í gær er nú komin upp í 202 og þá eru um 250 sárir. Árásin er sú mannskæðasta frá því að Bandaríkjamenn réðust inn í landið ásamt bandamönnum sínum í mars árið 2003.

Bifreiðum með mörg hundruð kílóum af sprengiefni var lagt við fjölfarið markaðstorg í hverfinu og þær sprengdar í loft upp og þegar fólk flýði af vettvangi í ofboði var sprengjum látið rigna yfir það. Útgöngubanni hefur verið komið á í Bagdad um óákveðinn tíma og þá hefur flugvellinum í borginni verið lokað.

Nouri al-Maliki, forsætisráðherra Íraks, kom fram í íröksku sjónvarpi í gær og hvatti til stillingar í landinu um leið og hann fordæmdi árásir trúarhópa sem miðuðu að því að sundra þjóðinni. Þá hvatti áhrifamesti sjíaklerkur landsins, Ali al-Sistani, menn til að grípa ekki til hefnda, en Sadr-hverfi er fátækrahverfi sjía. Bæði stjórnvöld í Washington og á Bretlandi hafa fordæmt árásirnar.

AP-fréttastofan segir frá því að reiðir íbúar í Sadr-hverfi og herskáir sjíar hafi safnast saman úti á götum eftir árásirnar og hrópað slagorð gegn súnníum og ljóst þykir að spennan milli trúarhópanna tveggja hefur síður en svo minnkað. Ekkert lát virðist á blóðbaðinu í Írak því á miðvikudag greindu Sameinuðu þjóðirnar frá því að aldrei hefðu fleiri almennir borgarar látist í einum mánuði en í október, eða 3700.

Erlent Fréttir

Mest lesið


Fleiri fréttir

Sjá meira


×

Mest lesið