Krafist fangelsis yfir dönskum blaðamönnum

Krafist er fangelsisdóms yfir tveim blaðamönnum og ritstjóra Berlingske Tidende, í Danmörku, vegna trúnaðarupplýsinga sem þeir birtu úr skýrslu sem leyniþjónustumaður lak til þeirra.

Skýrslan fjallaði um mat leyniþjónustu hersins á hættunni sem stafaði af ástandinu í Írak. Skýrslan var merkt trúnaðarmál, en Frank Grevil, starfsmaður leyniþjónustunnar afhenti blaðamönnunum hana og þeir birtu hana í Berlingske Tidende. Grevil var rekinn úr leyniþjónustunni, eftir atburðinn.

Blaðamennirnir og ritstjórinn komu fyrir rétt í Kaupmannahöfn í dag. Saksóknarinn sagði í ákæru sinni að það eigi að kosta fangelsisvist ef skýrsla sem merkt er trúnaðarmál sé birt í dagblaði. Hann sagði að rétturinn ætti að fjalla um takmörk tjáningaferlsisins. Hvað blaðamenn megi skrifa og hvað þeir megi ekki skrifa. Hvað almenningur eigi að fá að vita og hvað ekki.