Þrír af hverjum fjórum félagsmönnum VR með hlunnindi

Nær þrír af hverjum fjórum félagsmönnum VR njóta hlunninda af einhverju tagi sem hluta af launakjörum. Þetta kemur fram í launakönnun VR sem greint er frá á heimasíðu félagsins. Er það mikil aukning frá árinu 2004 en það ár sögðust 43 prósent fá hlunnindi. Fleiri karlar fá hlunnindi en konur eða átta af hverjum tíu en tæplega sjö af hverjum tíu konum. Flestir fá styrki vegna líkamsræktar eða um þriðjungur félagsmanna. Svipað hlutfall fær GSM-síma frá vinnuveitanda og fjórðungur fær greiddan símakostnað.