17 smáskífulög og 23 myndbönd

Hljómsveitin Depeche Mode hefur gefið út safnplötuna The Best Of Depeche Mode: Volume 1. Platan hefur að geyma 17 smáskífulög sveitarinnar sem flest hver hafa notið mikilla vinsælda undanfarin 25 ár.

Á meðal laga á plötunni eru Personal Jesus, Just Can"t Get Enough, Everything Counts, Enjoy The Silence og nýjasta smáskífulagið, Martyr.

Lögin eru tekin af ellefu hljóðversplötum Depeche Mode sem voru teknar upp á árunum 1981 til 2005.

Með plötunni fylgir í takmörkuðu upplagi DVD-mynddiskur með 23 tónlistarmyndböndum með hljómsveitinni, meðal annars með lögum sem eru ekki á safnplötunni. Má þar nefna Stripped, A Question of Time, Barrel of A Gun, Only When I Lose Myself og I Feel Loved. Einnig er þar hálftíma löng stuttmynd um sveitina.

Plata Depeche Mode frá síðasta ári, Playing the Angel, hefur selst í þremur milljónum eintaka. Komst hún í toppsæti vinsældalista í átján löndum. Á þessu ári hefur hljómsveitin spilað fyrir framan 2,5 milljónir áhorfenda í 31 landi á Playing the Angel-tónleikaferðinni.